Cercle Brugge enn á botninum

Cercle Brugge tapaði, 3-0, fyrir Lokeren í belgísku úrvalsdeildinni í knattspyrnu í dag en þeir Arnar Þór Viðarsson og Eiður Smári Guðjohnsen leika fyrir botnlið Cercle Brugge.

Báðir voru þeir í byrjunarliðinu en náðu ekki að setja mark sitt á leikinn eins og liðið allt.

Fyrsta mark leiksins skoraði Mijat Maric eftir aðeins átta mínútna leik en það var síðan Hamdi Harbaoui sem tryggði Lokeren sigurinn tíu mínútum fyrir leikslok.

Heimamenn voru ekki hættir og bættu við þriðja markinu á 90. mínútu leiksins þegar Nill De Pauw skoraði.

Cercle Brugge er í neðsta sæti deildarinnar með 14 stig en Lokeren í því þriðja með 40 stig.