Hinn 16 ára Bruno Gomes á leiðinni til United

Manchester United er við það að ganga frá samningi við brasilíska undrabarnið Bruno Gomes frá Desportivo Brasil, en þetta segir umboðsmaður leikmannsins, Gilmar Rinaldi, í viðtali ytra.

Leikmaðurinn fangaði athygli John Calvert-Toulmin, einn af aðalnjósnurum Manchester United, á síðasta ári og fór Alex Ferguson, knattspyrnustjóri Man. Utd., strax að fylgjast með leikmanninum.

„Við höfum lagt allt í sölurnar til að koma stráknum til Manchester United," sagði Paulo Oliveira, faðir drengsins.

Samkomulag hefur í raun náðst milli Manchester United og Desportivo Brasil og aðeins formsatriði að koma leikmanninum til félagsins.

Bruno Gomes tryggði Desportivo Brasil titilinn í keppni undir 17 ára í Brasilíu á síðasta tímabili en þá skoraði hann 88 mörk í 32 leikjum.