Aron Einar tryggði Cardiff sigur og fimm stiga forskot

Aron Einar Gunnarsson kom inn á sem varamaður og skoraði sigurmark Cardiff City á móti Crystal Palace í toppslag ensku b-deildarinnar í dag. Cardiff City er í framhaldinu komið með fimm stiga forskot á toppnum.

Mile Jedinak kom Crystal Palace í 1-0 strax á 4. mínútu leiksins en Craig Noone jafnaði metin mínútu fyrir hálfleik.

Aron Einar kom inn á sem varamaður í hálfleik og skoraði sigurmarkið á 73. mínútu með skalla eftir stoðsendingu frá Craig Bellamy. Þetta var sjötta deildarmark hans á tímabilinu.

Heiðar Helguson var í byrjunarliði Cardiff City en var tekin útaf á 57. mínútu þegar staðan var 1-1.

Björn Bergmann Sigurðarson kom inn á í hálfleik þegar Wolves tapaði 0-3 á heimavelli á móti Peterborough en staðan var þá orðin 0-2.