Ferguson: Við vorum frábærir í klukkutíma

Sir Alex Ferguson, stjóri Manchester United, sá sína menn vinna 3-1 sigur á Sunderland í ensku úrvalsdeildinni í dag og ná aftur sex stiga forskoti á toppi ensku úrvalsdeildarinnar.

„Við vorum frábærir í klukkutíma, vorum að spila flottan fótbolta og gátum skorað fullt af mörkum. Ég veit ekki hvað gerðist þá því Sunderland hefði getað skorað tvö eða þrjú mörk á lokakaflanum sem hefði verið vandræðalegt fyrir okkur. Ég veit ekki hvort við höfum slakað svona á eða að Sunderland hafi gefið í," sagði Sir Alex Ferguson.

„Það er mikilvægt að halda áfram eftir sigra eins og í Manchester-slagnum um síðustu helgi. Við reynum að halda okkar flugi áfram og sýna áfram stöðugleika. Vonandi verðum við enn í toppsætinu þegar nýja árið rennur í garð," sagði Ferguson.