Brendan Rodgers: Ég veit ekki hvaðan þessi spilamennska kom

Brendan Rodgers, stjóri Liverpool, var daufur í dálkinn eftir 1-3 tap á heimavelli á móti Aston Villa í ensku úrvalsdeildinni í dag. Liverpool hefur aðeins unnið 3 af 9 heimaleikjum sínum á tímabilinu.

„Þessi úrslit eru mikil vonbrigði og ekki var frammistaðan minni vonbrigði. Ég veit ekki hvaðan þessi spilamennska kom því þetta var ólíkt okkur. Við vorum kærulausir í síðustu sendingunni og nýttum ekki færin okkar," sagði Brendan Rodgers.

„Við verðum að skrifa þetta á slæman dag og halda áfram. Við vorum ekki nógu beittir í dag. Við áttum að fá víti þegar Daniel Agger var togaður niður og hefðum þá getað minnkað muninn í 2-1 sem hefði breytt miklu. Við urðum hinsvegar alveg flatir eftir að þeir komust í 3-0. Við gerðum bara ekki nóg í þessum leik, verðurm bara að læra af þessu og halda áfram," sagði Brendan Rodgers.