Fellaini komst upp með það að skalla leikmann Stoke

Everton-maðurinn Marouane Fellaini er örugglega á leiðinni í leikbann þrátt fyrir að hann hafi ekki verið rekinn útaf í 1-1 jafnteflisleik Everton og Stoke í ensku úrvalsdeildinni í dag.

Fellaini lenti þrívegis saman við Ryan Shawcross í leiknum og það versta var þegar Belginn skallaði Shawcross eftir hornspyrnu án þess að dómarar leiksins tækju eftir því.

David Moyes, stjóri Everton, var ekki ánægður með sinn mann. „Hann á skilið að fá refsingu. Ég hef séð þetta og það er skelfilegt að gera svona svo ég býst við refsingu. Nú er þetta bara hjá enska sambandinu. Ég hef sagt Fellaini að svona framkoma er óásættanleg og hann á skilið allt sem fær," sagði David Moyes.

„Ég leyfi David að taka á hegðun Fellaini en þetta er í þriðja sinn á tímabilinu þar sem andstæðingur okkar á að fá rautt spjald en sleppur. Ég er ánægður með Mark Halsey sem dómara en hann hefur líklega ekki séð þetta atvik sem er skrítið," sagði Tony Pulis, stjóri Stoke.