Allt botnfrosið í samskiptum Wenger og Bould

Það er mótvindur í herbúðum enska úrvalsdeildarliðsins Arsenal þessa dagana. Liðið féll úr keppni gegn D-liði Bradford í deildabikarnum í þessari viku og samskipti Arsene Wenger knattspyrnustjóra og aðstoðarþjálfarans Steve Bould eru ekki upp á það allra besta. Stewart Robson, fyrrum leikmaður Arsenal, gagnrýndi Wenger harkalega í gær og sagði liðið á rangri leið undir stjórn Wenger.

Bould tók við af Pat Rice sem hægri hönd Wenger og hlutverk Bould er að vinna með varnarleik liðsins og stoppa í þau göt. Sögusagnir er um að Bould sé alls ekki að sinna starfi sínu og hafa leikmenn gagnrýnt hve illa er staðið að æfingum hvað varðar varnarleik liðsins. Í því samhengi má nefna að Bould er með um 300 milljónir kr. í árslaun hjá Arsenal

Í frétt Daily Mail er greint frá því að samstarf Wenger og Bould sé botnfrosið. Á æfingu liðsins daginn fyrir 2-0 tap liðsins gegn Swansea á dögunum stjórnaði þrekþjálfarinn Tony Colbert æfingunni í fjarveru Wengers en Bould var hvergi sjáanlegur.

Robson, fyrrum leikmaður Arsenal, er harðorður í garð Wenger í viðtali við Daily Mail. „Arsene Wenger er með gríðarlegt sjálfsálit, og hann er einræðisherra þegar kemur að Arsenal. Hann leyfir Steve Bould ekki að gera það sem hann langar til. Wenger hefur náð að búa til góða leikmenn en hann gerði það síðast fyrir sex eða sjö árum. Í dag þá verða leikmenn verri undir hans stjórn. Ég sá Gervinho leika fyrir Fílabeinsströndina áður en hann kom til Arsenak, hann var góður þá. Það sama gildir um Arshavin þegar hann lék fyrir Rússa og Zenit, og Aaron Ramsey þegar hann var með U21 árs landsliði Wales. Arsenal er að taka skref aftur á bak og margir leikmenn eru einnig að taka skref aftur á bak," sagði Robson.