Noel Gallagher: Ég grét eins og barn þegar Aguero skoraði

Noel Gallagher, einn af þekktustu stuðningsmönnum Manchester City, missti af leiknum á móti QPR í gær þar sem hann er á hljómleikaferð í Suður-Ameríku. Bróðir hans Liam var þó mættur í stúkuna og sást sprauta úr kampavínsflösku þegar titillinn var í höfn.

Þessir fyrrum félagar í Oasis hafa stutt Manchester City í gegnum súrt og sætt en Noel Gallagher horfði að sjálfsögðu á leikinn þar sem hann var staddur í Santiago höfuðborg Chile.

„Þetta var rosalegt. Spenna, fögnuður, spenna og svo varð allt svart um tíma og ég hélt að við værum að missa þetta frá okkur. Ég grét síðan eins og barn þegar Aguero skoraði," sagði Noel Gallagher í útvarpsviðtali við BBC.

Argentínumaðurinn Sergio Aguero skoraði sigurmarkið á fimmtu mínútu í uppbótartíma og tryggði Manchester City fyrsta Englandsmeistaratitilinn í 44 ár og þann annan á ævi Noel Gallagher.

Noel Gallagher er fæddur í maí 1967 og var því eins árs þegar City varð síðast meistari. Liam Gallagher er aftur á móti þremur árum yngri.