Arsenal semur við Wilshere og fjóra aðra

Stuðningsmenn Arsenal fengu góðar fréttir þegar fimm leikmenn félagsins skrifuðu undir nýja langtímasamninga við félagið.

Þetta eru þeir Jack Wilshere, Kieran Gibbs, Aaron Ramsey, Alex-Oxlade Chamberlain og Carl Jenkinson.

Wilshere skrifaði undir samning til ársins 2018 og hinir leikmennirnir bættu fjórum til fimm árum við sinn samning.

"Ég trúi því að þegar maður er með sterkan kjarna af breskum leikmönnum þá er auðveldara að halda þeim. Við erum himinlifandi að þessir strákar skuli allir hafa skrifað undir svona langa samninga," sagði Arsene Wenger, stjóri Arsenal.

Wenger segist einnig vera vongóður um að Theo Walcott fáist til þess að skrifa undir nýjan samning en samningur hans rennur út næsta sumar.