Lokomotiv frá Moskvu hefur áhuga á Adebayor

Rússneska knattspyrnuliðið Lokomotiv frá Moskvu hefur áhuga á að fá Emmanuel Adebayor í sínar raðir samkvæmt frétt Telegraph á Englandi. Adebayor lék sem lánsmaður hjá Tottenham á síðustu leiktíð en hann er enn samningsbundinn Englandsmeistaraliði Manchester City.

Tottenham og Manchester City hafa komist að samkomulagi um kaupverð á framherjanum en ekki er búið að ganga frá samningi við leikmanninn um kaup og kjör hjá Tottenham. Adebayor var með 175.000 pund í vikulaun hjá Man City og það er ólíklegt að Tottenham muni bjóða honum slík kjör – eða sem nemur 35 milljónum ísl. kr.

Forráðamenn Lokomotiv eru tilbúnir með gott tilboð fyrir leikmanninn ef hann nær ekki að semja um kaup og kjör við Tottenham.