Halsey dómari stal senunni í sigri Man. Utd. á Liverpool

Manchester United sigraði Liverpool 2-1 á útivelli í hádegisleik enska boltans í dag. Liverpool var mun sterkari aðilinn í leiknum þrátt fyrir að leika einum færri í rúmar 50 mínútur en Mark Halsey dómari stal senunni með stórum dómum sem réðu úrslitum í leiknum.

Halsey rak Jonjo Shelvey útaf fyrir litlar sakir þegar sex mínútur voru til hálfleiks. Shelvey fór vissulega glæfralega í tæklinguna á móti Jonny Evans en það sama má segja um Evans en Shelvey fór beint í boltann og takkarnir snéru niður.

Þrátt fyrir að vera einum færri komst Liverpool yfir á fyrstu mínútu seinni hálfleiks með marki Steven Gerrard.

Það tók Manchester United aðeins fimm mínútur að jafna metin með mjög laglegu marki Rafael úr einni af fyrstu sóknum Man. Utd. í leiknum.

Þegar fimmtán mínútur voru eftir af leiknum stal Halsey senunni á ný. Valencia féll í vítateig Liverpool án þess að nokkur maður kæmi við hann og Halsey benti beint á punktinn. Robin van Persie skoraði af öryggi úr spyrnunni og tryggði gestunum dýrmætan sigur.

Þeirra 96 sem féllu í Hillsborough slysinu 1999 var minnst á fallegan hátt fyrir leikinn í ljósi sannleiksskýrslunnar sem kynnt var í síðustu viku. Ætla má þó að það verði ekki helsta umræðuefnið eftir leikinn heldur framganga Halsey dómara sem réð engan vegin við verkefnið og stærð leiksins.

Manchester United lyfti sér í annað sæti deildarinnar með sigrinum en Liverpool er í fallsæti eftir fimm leiki, án sigurs.

Gang leiksins í grófum dráttum má lesa hér að neðan:

97. mínúta: Mark Halsey flautar til leiksloka. 2-1 sigur Mancester United staðreynd á lánlausu liði Liverpool.

83. mínúta: Kelly í fínu færi en skalli hans ekki nógu góður.

81. mínúta: 1-2. Van Persie skorar, Pepe Reina fór í rétt horn en vítið of fast og of utarlega.

80. mínúta: Agger er borinn af leikvelli, nú verður hægt að taka vítið.

76. mínúta: Halsey dæmir víti á Liverpool, á hvað veit enginn nema hann.

65. mínúta: Liverpool enn og aftur aðgangsharðir. Susso með fínt skot en Lindegaard ver enn og aftur.

61. mínúta: Liverpool er enn sterkari aðilinn þrátt fyrir að leika manni færri. Suarez var ekki langt frá því að skora en Lindegaard varði mjög vel frá honum.

54. mínúta: Gerrard með skot beint á Lindegaard. Opinn og skemmtilegur leikur í seinni hálfleik.

51. mínúta: 1-1. Það tók Man. Utd. ekki langan tíma að jafna. Valencia með fyrirgjöf, Kagawa kassaði boltann á Rafael sem átti frábært skot í fjærhornið.

46. mínúta: 1-0. Það tók Liverpool 50 sekúndur að skora í seinni hálfleik. Fyrirliðinn Steven Gerrard réttur maður í teignum. Góð sókn upp hægri kanntinn, hinn 18 ára gamli Susso með fyrirgjöf, Man. Utd. nær ekki að hreinsa almennilega. Glen Johnson kemur boltanum á Gerrard sem skoraði af stuttu færi.

Hálfleikur: 0-0. Liverpool mun betri í fyrri hálfleik en rauða spjaldið gerir heimamönnum erfitt fyrir.

42. mínúta: Suarez með fínt skot beint úr aukaspyrnu en Lindegaard varði vel.

39. mínúta: Jonjo Shelvey rekinn útaf. Ótrúlega strangur dómur. Liverpool verið mikið betri til þessa í leiknum.

27. mínúta: Það er að lifna yfir leiknum aftur. Suarez með skemmtilega tilraun, rétt yfir.

26. mínúta: Nani með skot yfir, beint úr aukaspyrnu af 25 metra færi.

21. mínúta: Daniel Agger vill fá víti en ekkert dæmt. Líklega rétt hjá Halsey dómara.

9. mínúta: Leikmenn Liverpool eru hættulegir í sínum aðgerðum. Van Persie rétt nær að stýra skoti Steven Gerrard aftur fyrir endamörk eftir hornspyrnu.

7. mínúta: Giggs með fyrsta fína færið en skot hans rétt utan vítateigs sveif hárfínt framhjá markinu.

Fyrir leik: You´ll Never Walk Alone var áhrifameira en nokkurn tímann fyrr. Allir sungu og heiðruðu minningu þeirra látnu sem aldrei fyrr.

Fyrir leik: 96 blöðrum var sleppt upp í loft til minningar um þá sem misstu líf sitt í Hillsborough slysinu.

Fyrir leik: Suarez og Evra tókust í hendur án allrar dramatíkur.

Staðan í ensku úrvalsdeildinni.