Appleton: Liverpool hefur spurst fyrir um Ince

Michael Appleton, knattspyrnustjóri Blackpool, segir að Liverpool hafi spurst fyrir um kantmanninn Thomas Ince. Ekki hafi þó verið gengið frá neinu samkomulagi varðandi félagaskipti hans.

Ince, sem er uppalinn hjá Liverpool, hefur farið á kostum með Blackpool á leiktíðinni. Ince hefur skorað 13 mörk í 21 leik og vafalaust verið besti leikmaður liðsins.

„Ég held að stjórnarformaðurinn Karl Oyston hafi átt í viðræðum við Liverpool," segir Appleton við BBC.

„Eftir því sem ég best veit eru upphæðirnar sem nefndar hafa verið til sögunnar langt undir væntingum okkar fyrir leikmann með jafnmikla hæfileika," segir Appleton.

Ince spilaði einu sinni fyrir aðallið Liverpool í deildabikarnum en hefur skotist upp á stjörnuhimininn í búningi Blackpool. Hann skoraði átta mörk á síðustu leiktíð en hefur gert enn betur á yfirstandandi tímabili.

Ince er sonur Paul Ince sem spilaði meðal annars með Liverpool og Manchester United á sínum tíma. Ince var einnig fyrirliði enska landsliðsins og fyrsti þeldökki leikmaðurinn til að hlotnast sá heiður.