McDermott: Ekki afskrifa Reading

Brian McDermott, knattspyrnustjóri Reading, telur að liðið eigi enn möguleika á að bjarga sér frá falli. Reading tapaði 5-2 á heimavelli gegn Arsenal í ensku úrvalsdeildinni í gærkvöldi en tapið var það sjötta í röð.

„Við vorum utan úrvalsdeildarinnar í fjögur ár og munum gera allt sem í okkar valdi stendur til að vera í deildinni á næsta tímabili," segir McDermott. Reading lenti 4-0 undir gegn Arsenal en minnti á sig með tveimur mörkum í síðari hálfleik. Theo Walcott tryggði Arsenal sigurinn með fínu marki seint í hálfleiknum.

„Ekki afskrifa okkur," segir McDermott sem hefur verið tölvuert gagnrýndur af stuðningsmönnum félagsins. Gagnrýnin var þó víðsfjarri síðastliðið vor þegar McDermott stýrði Reading upp í ensku úrvalsdeildina á nýjan leik. McDermott var kjörinn stjóri ársins í Championship-deildinni það tímabilið.

Eftir tapið í gær situr Reading enn í botnsæti deildarinnar með níu stig. QPR hefur tíu stig og Southampton og Wigan 15 stig. Svipmyndir úr viðureign Reading og Arsenal má sjá í spilaranum hér fyrir ofan.