Mancini ætlar ekki að selja Balotelli í janúar

Sagan endalausa um framtíð Mario Balotelli hjá Manchester City heldur áfram. Balotelli er án efa ekki á jólakortalistanum hjá Roberto Mancini knattspyrnustjóra Man City en þeir hafa ekki náð vel saman á undanförnum misserum. Það búast margir við því að Balotelli verði seldur þegar leikmannamarkaðurinn opnar í janúar en Mancini er ekki tilbúinn að láta Balotelli fara frá félaginu.

Balotelli var í byrjunarliði Man City gegn Man Utd í risaleik helgarinnar í ensku knattspyrnunni. Ítalska framherjanum var skipt útaf snemma í síðari hálfleik. Og gagnrýndi Mancini leikmanninn í leikslok en Man City tapaði 3-2.

Mancini sagði m.a. að Balotelli væri að sóa hæfileikum sínum og lagði áherslu á að hann gæti ekki komist upp með slíkt hjá Man City. Samkeppnin væri of mikil þar á bæ.

Mancini sagði í sjónvarpsviðtali við Sky sport á Ítalíu að það kæmi ekki til greina að selja Balotelli. „Hann er ekki tol sölu. Balotelli er leikmaður Manchester City, stuðningsmennirnir elska hann, og hann er mikilvægur fyrir liðið. Leikmaður með slíka hæfileika á að einbeita sér að vinnunni og fjölskyldunni, hann hefur gríðarlega hæfileika og hann má ekki sóa þeim," sagði Mancini.