D-deildarlið Bradford sló Arsenal út

Arsenal er úr leik í enska deildabikarnum í knattspyrnu eftir dramatískt tap gegn D-deildarliði Bradford í kvöld. Vítaspyrnukeppni þurfti til að knýja fram úrslitin.

Heimamenn í Bradford komust yfir á 16. mínútu leiksins með marki Garry Thompson. Stuðningsmenn Bradford fögnuðu sem óðir væru enda skildu yfir sjötíu sæti liðin að í ensku deildakeppninni fyrir leikinn.

Heimamenn komust nær því að bæta við marki en Arsenal að jafna metin fyrir hálfleik en staðan var 1-0 í hálfleik.

Gestirnir sem tefldu fram sterku liði sóttu í sig veðrið í síðari hálfleik. Jöfnunarmarkið kom þó ekki fyrr en tveimur mínútum fyrir leikslok þegar Belginn Thomas Vermaelen jafnaði eftir atgang í teig heimamanna.

Ekkert mark var skorað í framlengingunni og því gripið til vítaspyrnukeppni. Santi Cazorla, Marouane Chamakh og Thomas Vermaelen klúðruðu allir spyrnum sínum og Bradford því komið í undanúrslit.

Fyrr í kvöld tryggði Aston Villa sér sæti í undanúrslitum með 4-1 útisigri á Norwich.