Daniel Sturridge á leið í læknisskoðun hjá Liverpool

Liverpool Echo greinir frá því að Daniel Sturridge, sóknarmaður Chelsea, sé á leið í læknisskoðun hjá Liverpool á morgun.

Sturridge hefur verið sterklega orðaður við Liverpool undanfarna daga og nú loga netheimar í fréttum þess efnis að læknisskoðun kappans fari fram á morgun.

Talið er að ágreiningur um þá upphæð sem umboðsmaður Sturridge ætti að fá í sinn hlut hafi dregið félagaskiptin á langinn. Kaupverðið er talið vera um tólf milljónir punda eða sem nemur tæpum tveimur og hálfum milljarði íslenskra króna.

Liverpool vann fyrr í dag öruggan 4-0 sigur á Fulham. Chelsea mætir Aston Villa á morgun. Sturridge verður ekki formlega leikmaður Liverpool fyrr en félagaskiptaglugginn opnar í janúar.