Downing ekki lengur á sölulista hjá Liverpool

Brendan Rodgers, stjóri Liverpool, er ánægður með frammistöðu Stewart Downing að undanförnu og segir það ekki koma lengur til greina að selja enska landsliðsmanninn frá félaginu.

Stewart Downing gekk illa á sínu fyrsta tímabili eftir að Liverpool keypti hann á 20 milljónir punda frá Aston Villa og Rodgers hafði rætt opinberlega um þann möguleika að selja leikmanninn í janúar.

„Á síðustu sex til sjö vikum hefur hann sýnt frábæran stöðugleika og hefur tekið því vel að spila mismundandi leikstöður á vellinum," sagði Brendan Rodgers á blaðamannafundi fyrir leikinn á móti Stoke í kvöld.

„Ég var mjög ánægður fyrir hans hönd eftir frábæran leik hans á móti Fulham. Hann skoraði eitt, lagði upp annað og ógnaði allan leikinn. Hann spilaði líka mjög vel sem bakvörður á móti Aston Villa," sagði Rodgers.

„Hann er á þeim aldri þar sem hann á að vera að spila sinn besta bolta. Hann er mjög góður leikmaður og er á sama blaði og aðrir leikmenn liðsins. Þegar hann er að spila eins og hann gerði á móti Fulham þá eru ekki margir betri í hans stöðu. Vonandi heldur hann áfram að spila svona vel," sagði Rodgers.