Michael Owen nýtur þess ekki að spila á móti Liverpool

Michael Owen hefur aldrei náð því að skora á móti Liverpool en hann getur breytt því í kvöld þegar Liverpool og Stoke City mætast í kvöldleiknum í ensku úrvalsdeildinni. Owen viðurkennir að hann eigi ekki góðar minningar frá því að mæta sínu uppeldisfélagi.

Michael Owen er orðinn 33 ára gamall og hann er á sínu fyrsta ári hjá Stoke City. Eins og áður hefur hann glímt mikið við meiðsli og hefur aðeins náð að spila í 57 mínútur samanlagt í ensku deildinni á tímabilinu.

Michael Owen fór frá Liverpool árið 2004. „Það er mjög sérstakt að mæta sínu gamla félagi ekki síst þegar maður var þar í fimmtán ár. Liverpool er stór hluti af mínu lífi og ég átti mörg af mínum bestu árum hjá félaginu," sagði Michael Owen við Independent.

„Ég hef ekki haft gaman að því að mæta þeim. Ég hef aldrei skorað á móti Liverpool og hef ekki náð að njóta leikjanna á móti þeim," sagði Owen sem skoraði á sínum tíma 118 mörk fyrir Liverpool.

Owen lék síðast með Stoke í lok október en verður væntanlega í leikmannahópi Stoke í kvöld.