United vann Newcastle í sjö marka leik

Manchester United vann ótrúlegan sigur, 4-3, á Newcastle á Old Trafford í dag. Heimamenn lentu í þrígang undir í leiknum.

Gestirnir í Newcastle fengu draumabyrjun þegar þeir komust yfir eftir aðeins fjögurra mínútna leik þegar James Perch skoraði auðvelt mark. David de Gea varði boltann út í teiginn þar sem Perch var mættur og renndi boltanum í netið. Eftir markið réðu heimamenn lögum og lofum á vellinum og pressuðu stíft að marki Newcastle.

Jöfnunarmarkið kom um miðjan hálfleikinn þegar Jonny Evans skoraði fínt mark eftir mikinn darraðardans innan vítateigs Newcastle. Evans var aftur á ferðinni fjórum mínútum síðar þegar hann skoraði annað mark, en því miður fyrir hann var það sjálfsmark. Staðan var því 2-1 í hálfleik.

Heimamenn byrjuðu síðari hálfleikinn með látum og voru með boltann nánast linnulaust til að byrja með. Það var Frakkinn Patrice Evra sem jafnaði metin fyrir United þegar rúmlega hálftími var eftir af leiknum með fínu skoti fyrir utan vítateig Newcastle. Það leit allt út fyrir að að Manchester United myndi þarna taka yfirhöndina í leiknum en svo var alls ekki.

Papiss Cissé kom Newcastle aftur yfir tíu mínútum síðar. Það tók reyndar heimamenn ekki langan tíma að jafna enn einu sinni þegar Robin van Persie skoraði þriðja mark United með fínu marki eftir mikið klafst inn í teig andstæðingsins.

Gríðarleg spenna var í leiknum næstu mínútur og United sótti án afláts. Eftir að Hernandex hefði misnotað fjöldann allan af dauðafærum var komið að honum að tryggja Manchester United sigurinn í uppbótartíma með fínu marki.

Sigur í sjö marka leik og Manchester United virðist einfaldlega alltaf koma til baka. Liðið hefur nú sjö stiga forskot á toppi deildarinnar með 46 stig.

Staðan í ensku úrvalsdeildinni.