Sir Alex Ferguson: Þetta var sönn meistaraframmistaða

Sir Alex Ferguson, stjóri Manchester United, var kátur eftir sigurinn á Newcastle í ensku úrvalsdeildinni í dag. Unted lenti þrisvar sinnum undir í leiknum en tókst að tryggja sér þrjú stig í lokin.

„Desember er alltaf mikilvægur mánuður. Við töpuðum tveimur stigum á móti Swansea en bættum fyrir það í dag. Þetta var sönn meistaraframmistaða," sagði Sir Alex Ferguson en hann var ekki með Wayne Rooney í leikmannahóp sínum í dag.

„Rooney teygði á liðbandi í hné á æfingu og verður frá í tvær til þrjár vikur. Við erum að að vera uppiskroppa með skotfæri," sagði Ferguson.

Ferguson tók hárblásarann á dómarana í hálfleik en hann var mjög ósáttur með þá ákvörðun að dæma annað mark Newcastle gilt eftir að aðstoðardómarinn hafði fyrst veifað rangstöðu.

„Það var slæm ákvörðun að dæma markið gilt. Hann er greinilega rangstæður og þá togar hann líka í handlegg Jonny Evans og ef það eru ekki afskipti hvað eru þá afskipti" sagði Sir Alex Ferguson.