Unglingur handtekinn | Sendi Ferdinand gróf skilaboð

Lögreglan í Manchester handtók í dag 15 ára unglingsstrák sem er sakaður um að hafa sent Rio Ferdinand, leikmanni Manchester United, skilaboð sem innihéldu kynþáttaníð um helgina.

Strákurinn sendi Ferdinand skilaboðin á Twitter meðan á viðureign Manchester-liðanna í United og City stóð á sunnudaginn. Kynþáttafordómar voru hafðir frammi í skilaboðunum. Strákurinn hefur verið látinn laus gegn tryggingu.

United vann 3-2 sigur í grannaslagnum sem gekk ekki áfallalaust fyrir sig. Stuðningsmaður heimaliðsins hljóp meðal annars inn á völlinn en Joe Hart, markvörður City, stöðvaði stuðningsmanninn sem átti greinilega ýmislegt vantalað við Ferdinand í kjölfar sigurmarks United undir lok leiksins.

Þá fékk Ferdinand einnig smápening í höfuðið en ekki hefur tekist að bera kennsl á áhorfandann sem kastaði peningnum. Alls voru níu handteknir í tengslum við leikinn en lögreglan í Manchester biðlar til almennings varðandi upplýsingar um þann sem kastaði smápeningnum.