Sunderland úr fallsæti eftir sigur á Reading

Sunderland vann góðan heimasigur á Reading í frestuðum leik í ensku úrvalsdeildinni í knattspyrnu í kvöld.

James McClean kom heimamönnum yfir strax á 3. mínútu með með góðu skoti með vinstri fæti úr teignum. Stuðningsmenn heimamanna fögnuðu aftur á 28. mínútu þegar Skotinn Steven Fletcher skoraði.

Í viðbótartíma bætti Benínmaðurinn og fyrirliðinn Stephane Sessegnon við þriðja marki Sunderland og kærkominn sigur í höfn.

Heimamenn nældu sér í þrjú dýrmæt stig í fallbarátunni. Sunderland hefur nú 16 stig í 15. sæti en Reading er í 19. sæti með níu stig.

Brynjar Björn Gunnarsson sat allan tímann á varamannabekk Reading í kvöld.