Wenger: Leikmenn þurfa ekki að skammast sín

Arsene Wenger, knattspyrnustjóri Arsenal, varði sína leikmenn í viðtölum eftir að liðið féll úr keppni í deildabikarnum gegn Bradford í gærkvöld. Wenger lagði áherslu á að leikmenn liðsins þyrftu ekki að skammast sín fyrir úrslitin og tapið.

Bradford er 64 sætum fyrir neðan Arsenal í deildarkeppninni – en liðið leikur í fjórðu efstu deild og og félagið hefur aðeins keypt einn leikmann fyrir þetta tímabil á 1,5 milljónir kr. eða 7.500 pund.

Bradford hafði betur gegn Arsenal, 3-2, eftir framlengingu og vítaspyrnukeppni.

„Þú þarft að skammast þín ef þú gefur ekki allt sem þú átt í leikinn, en að mínu mati voru leikmennirnir að leggja sig fram. Ég á frekar von á því að þeir séu frekar pirraðir og svekktir – en þeir þurfa ekki að skammast sín. Ég er ekki ánægður en ég óska Bradford til hamingju með sigurinn. Þeir vörðust vel en við náðum ekki að nýta færin sem við fengum. Við náðum ekki að nýta þrjár vítaspyrnur og það er of mikið. Um tíma voru fimm framherjar inni á vellinum hjá okkur en okkur tókst bara ekki að skora. Við munum ekki dvelja of lengi við þessi úrslit – næsti leikur er það sem skiptir mestu máli," sagði Wenger.