Bradford City: Sigurinn á Arsenal í gær bjargar fjármálum félagsins

Dave Baldwin, yfirmaður knattspyrnumála hjá enska d-deildarliðinu Bradford City, er að sjálfsögðu í skýjunum eftir að félag sló Arsenal út úr átta liða úrslitum enska deildarbikarsins í gærkvöldi.

Sigur Bradford City liðsins er einn sá óvæntasti í sögu keppninnar en liðið vann í vítakeppni eftir að hafa verið 1-0 yfir stærsta hluta venjulegs leiktíma.

„Þessi sigur hefur gulltryggt framtíð félagsins. Tveir sjónvarpsleikir munu skila félaginu milljón pundum aukalega," sagði Dave Baldwin.

„Leikurinn í gær hafði gríðarlega góð á fjárhagsstöðu félagins og helmingur skuldanna þurrkaðist út á einu bretti. Auðvitað erum við að áætla tekjur okkar af komandi leikjum en þetta er svaka innspýting í rekstur félagsins," sagði Baldwin.

Bradford City var í ensku úrvalsdeildinni tímabilið 2000 til 2001 en hefur síðan fallið alla leið niður í d-deildina þar sem liðið hefur verið frá og með 2007-08 tímabilinu.