Gareth Barry fékk eins leiks bann og sekt

Gareth Barry ætlar ekki að áfrýja úrskurði aganefndar enska knattspyrnusambandsins en hann þarf að taka út leikbann þegar Manchester City mætir Newcastle á útivelli um helgina í ensku úrvalsdeildinni. Enski landsliðsmaðurinn var dæmdur í eins leiks bann vegna orða sem hann lét falla við Mark Clattenburg dómara eftir 3-2 tap Manchester City gegn Manchester United s.l. sunnudag.

Barry þarf einnig að greiða rétt um 1,5 milljónir kr. í sekt. Eftir að hafa ráðfært sig við Roberto Mancini knattspyrnustjóra Man City ákvað Barry að aðhafast ekkert og ljúka málinu þrátt fyrir að hann sé ekki sáttur við úrskurðinn.

Clattenburg var fjórði dómarinn í leiknum og á Barry að hafa notað niðrandi orðbragð í garð dómarans þegar hann gekk af velli í leikslok.