Nemanja Vidic aftur með United um helgina

Sir Alex Ferguson, stjóri Manchester United, staðfesti það á blaðamannafundi í dag að serbneski miðvörðurinn Nemanja Vidic verði í leikmannahópi hans á móti Sunderland í ensku úrvalsdeildinni um helgina.

Nemanja Vidic hefur ekkert spilað með United-liðinu síðan í september eftir að hafa meiðst á hné. Hann byrjaði að æfa á fullu með liðinu í síðustu viku en Sir Alex sparaði hann í leiknum á móti nágrönnunum í Manchester City.

„Nemanja er kominn aftur í hópinn en Jonny Evans verður augljóslega ekki með eftir að hafa meiðst um síðustu helgi," sagði Sir Alex Ferguson.

„Það er mjög stórt mál fyrir okkur að fá Vida aftur inn í hópinn en hann kemur inn með reynslu, skallatækni, ógn í föstum leikatriðum og svo er hann fyrirliðinn okkar. Það er síðan allt annað mál hvort að hann verði í byrjunarliðinu eða ekki," sagði Ferguson.

„Við ætlum að passa upp á hann í endurkomunni. Við gáfum honum langan tíma eftir síðustu meiðsli en því miður meiddist hans aftur. Á síðustu sextán mánuðum þá held ég að hann hafi aðeins náð að spila tíu leiki. Það er ekki mikill fótbolti fyrir mann sem er þrítugur. Við vonum að hann komist í gegnum þetta," sagði Fergsuon.