Manchester City nú bara þremur stigum á eftir United

Manchester City minnkaði forskot nágrannanna í Manchester United á toppi ensku úrvalsdeildarinnar í þrjú stig með því að vinna sannfærandi 3-1 sigur á Newcastle á St. James Park í hádegisleiknum í enska í dag.

Leikurinn var fjögur og skemmtilegur þar sem bæði lið fengu mörg færi til að bæta við mörkum en City-menn voru mun sterkari og unnu mikilvægan sigur í toppbaráttunni ekki síst í framhaldinu af tapi liðsins fyrir Manchester United um síðustu helgi.

Það hefur hinsvegar lítið gengið hjá Newcastle-liðinu að undanförnu en liðið hefur aðeins unnið einn af síðustu átta deildarleikjum sínum og er í 14. sæti deildarinnar.  

Newcastle byrjaði leikinn mjög vel og Joe Hart þurfti að hafa sig allan við til að verja frá Demba Ba strax á 2. mínútu leiksins. Newcastle ógnaði Manchester City í upphafi leiks en gestirnir áttu svar við því og breyttu leiknum með því að skora fyrsta markið.

Sergio Agüero kom þá City-liðinu í 1-0 strax á 10. mínútu eftir að hafa fengið boltann á silfurfati frá Samir Nasri og rent honum í autt markið. Yaya Toure átti mikinn þátt í markinu því hann átti stungusendinguna inn á Nasri.

Javi García bætti síðan við öðru marki á 39. mínútu með skalla eftir hornspyrnu frá David Silva og þannig var staðan í hálfleik.

Demba Ba minnkaði muninn í 2-1 á 51. mínútu með skalla eftir sendingu frá Fabricio Coloccini en City náði þá ekki að hreinsa almennilega frá eftir hornspyrnu. Papiss Cissé fékk mjög gott færi skömmu síðar en skaut yfir og Newcastle náði ekki að jafna leikinn.

Yaya Touré innsiglaði síðan sigur City með því að skora þriðja markið á 78. mínútu eftir að hafa fengið sendingu frá Pablo Zabaleta.