Aston Villa með þrjú mörk og þrjú stig frá Anfield

Aston Villa bætti stöðu síðan í botnbaráttunni með því að vinna frábæran 3-1 sigur á Liverpool á Anfield í ensku úrvalsdeildinni í dag. Liverpool-menn voru enn á ný seinheppnir á báðum endum vallarins og vildu fá að minnsta kosti tvær vítaspyrnur auk fjölda færa sem nýttust ekki.

Belgíumaðurinn Christian Benteke skoraði tvö marka Aston Villa liðsins sem hefur verið á uppleið eftir skelfilega byrjun og léku Villa-menn í dag sinn fimmta leik í röð án þess að tapa.

Liverpool hefur aftur á móti aðeins náð að vinna 3 af 9 heimaleikjum sínum á tímabilinu. Það var oft ótrúlegt að horfa upp á leikmenn klúðra vænlegum sóknum í þessum leik en svona hefur þetta verið í allan vetur.

Liverpool var miklu betra liðið framan af leik en tókst ekki að nýta fjölmörg færi og það var síðan Belginn Christian Benteke sem kom Aston Villa yfir á 29. mínútu. Andreas Weimann bætti síðan við öðrum marki fimm mínútum fyrir hálfleik eftir mjög flotta sókn og Liverpool-menn voru komnir í slæm mál.

Liverpool byrjaði seinni hálfleikinn í stórsókn en það var aftur Aston Villa sem skoraði þegar Christian Benteke slapp í gegn og kom Aston Villa í 3-0 á 51. mínútu. Þannig urðu síðan lokatölurnar.

Steven Gerrard náði að minnka muninn þremur mínútum fyrir leikslok þegar hann stýrði skoti Glen Johnson inn með höfðinu. Markið kom bara alltof seint og Aston Villa vann athyglisverðan sigur.