Reina: Ég á vonandi mín bestu ár eftir hjá Liverpool

Pepe Reina, markvörður Liverpool, missti úr sjö leiki í byrjun tímabilsins vegna meiðsla en hefur verið að spila vel að undanförnu. Reina er nú búinn að halda fjórum sinnum hreinu í síðustu sjö leikjum.

„Ég er að komast aftur í mitt besta form. Ég var svolítið óánægður með sjálfan mig í upphafi tímabilsins en vegna meiðslanna fékk ég tækifæri til að byrja aftur frá núllpunkti. Ég er ferskari núna og tilbúinn í slaginn," sagði Pepe Reina.

„Ég á vonandi mín bestu ár eftir hjá Liverpool. Það er talað um að markverður toppi á fertugsaldrinum og ég er orðinn þrítugur. Vonandi bíða mín góðir og gullnir tímar," sagði Reina.

Pepe Reina hefur spilað með Liverpool frá árinu 2005 en hann kom til liðsins frá Villarreal. Reina er einn af leikmönnunum sem hafa komið upp úr akademíunni hjá Barcelona.