Sir Alex: Ég kaupi engan í janúar

Sir Alex Ferguson, stjóri Manchester United, ætlar ekki að styrkja leikmannahópinn sinn þegar félagsskiptaglugginn opnar í næsta mánuði. Hann staðfesti þetta í viðtali við Mail on Sunday.

Ferguson var virkur á markaðnum í haust þegar hann fékk meðal annars til liðsins Robin van Persie frá Arsenal og Shinji Kagawa frá Borussia Dortmund. Van Persie hefur komið að 18 mörkum í fyrstu 17 umferðunum og er einn aðalmaðurinn á bak við það að United er með sex stiga forskot á toppnum.

Robert Lewandowski, framherji Dortmund, og Theo Walcott hjá Arsenal hafa báðir verið orðaðir við Manchester United liðið en knattspyrnustjórinn hefur lokað á þann möguleika.

„Það er öruggt að ég kaupi engan í janúar," sagði Sir Alex Ferguson við the Mail on Sunday. Ferguson mun aftur á móti lána einhverja af leikmönnum liðsins sem hafa ekki komist í aðalliðið í vetur.

Ítalski framherjinn Federico Macheda er örugglega einn af þeim sem fær að spreyta sig hjá öðru liði eftir áramót.