Cazorla með þrennu í stórsigri Arsenal

Arsenal fór úr áttunda sæti ensku úrvalsdeildarinnar upp í það fimmta í kvöld er liðið vann öruggan sigur, 2-5, á arfaslöku liði Reading.

Það var ljóst alveg frá upphafi í hvað stefndi. Podolski opnaði veisluna og Cazorla bætti við tveim  mörkum fyrir hlé og dagskránni nánast lokið.

Cazorla fullkomnaði þrennuna í síðari hálfleik en hann er aðeins þriðji Spánverjinn sem nær að skora þrennu í ensku úrvalsdeildinni. Hinir tveir eru Fernando Torres og Jordi Gomez.

Heimamenn lögðu ekki árar í bát og skoruðu tvö mörk með skömmu millibili. Smá spenna komin í leikinn og 20 mínútur eftir. Það reyndist skammgóður vermir því Theo Walcott negldi síðasta naglann í kistu heimamanna.

Reading er eftir sem áður í neðsta sæti deildarinnar með aðeins einn sigur það sem af er vetri.

Staðan í ensku úrvalsdeildinni.