Chelsea valtaði yfir Leeds í seinni hálfleik

Chelsea er komið áfram í enska deildarbikarnum eftir 1-5 sigur á Leeds. Chelsea var undir í hálfleik en reif sig upp í þeim síðari og hreinlega pakkaði neðrideildarliðinu saman.

Luciano Becchio skoraði eina mark fyrri hálfleiks fyrir heimamenn sem fóru brattir inn í klefa. Spánverjinn Juan Mata var fljótur að þagga niður í áhorfendum er hann jafnaði leikinn eftir eina mínútu í síðari hálfleik.

Chelsea skoraði svo tvö mörk með tveggja mínútna millibili um miðjan hálfleikinn og gerði út um leikinn. Branislav Ivanovic skoraði fyrst og svo Victor Moses.

Veislunni var þó alls ekki lokið því þeir Eden Hazard og Fernando Torres innsigluðu fínan sigur Chelsea á neðrideildarliðinu.