Mancini lætur Ashley Young heyra það

Sir Alex Ferguson, stjóri Man. Utd, kveikti bálið fyrir borgarslaginn gegn City í gær er hann benti á hversu mörg víti City fengi á heimavelli.

Eins og búast mátti við fóru ummælin ekki vel í Roberto Mancini, stjóra City, sem hefur svarað fyrir sig.

"Ég man mjög vel eftir síðasta ári þegar Ashley Young fór að synda á vellinum. Ég held hann sé búinn að dýfa sér 4-5 sinnum í síðustu tíu leikjum en Ferguson segir ekkert við því," sagði Mancini greinilega ósáttur en telur hann að Ferguson hafi viljandi látið ummælin falla til þess að æsa menn upp fyrir leikinn.

"Líklega. Fergie er mjög snjall í þessum sálfræðileikjum. Ég held að United hafi fengið einhver víti síðustu 15 ár. Kannski tvö eða þrjú," sagði Mancini kaldhæðinn.