Ferguson óánægður með Ferdinand

Alex Ferguson, stjóri Manchester United, lýsti yfir vonbrigðum sínum með að Rio Ferdinand hafi ekki tekið þátt í átaki ensku úrvalsdeildarinnar gegn kynþáttafordómum.

Leikmenn United klæddust allir bolum með áletruninni „Kick It Out" sem er slagorð herferðarinnar. Ferdinand gerði það hins vegar ekki eins og lesa má um hér fyrir neðan.

„Þetta eru vonbrigði. Ég sagði á blaðamannafundi í gær að allir myndu klæðast bolnum og þetta var því vandræðalegt fyrir mig," sagði hann í samtali við enska fjölmiðla.

„En það verður tekið á þessu. Þú þarft ekki að hafa neinar áhyggjur af öðru."