Jonjo Shelvey valinn í enska landsliðið

Liverpool-maðurinn Jonjo Shelvey er búinn að spila sig inn í enska landsliðið því Roy Hodgson hefur kallað á hann ásamt Chelsea-manninum Ryan Bertrand fyrir leiki Englendinga á móti San Marínó og Póllandi í undankeppni HM.

Jonjo Shelvey hefur blómstrað síðan að Brendan Rodgers tók við liði Liverpool eftir að miðjumanninum hafði gengið afar illa að vinna sér sæti í aðalliði Liverpool undir stjórn Kenny Dalglish.

Kieran Gibbs, vinstri bakvörður Arsenal, er meiddur og verður ekki með enska landsliðinu í þessum leikjum en Ashley Cole verður með liðinu þrátt fyrir að enska sambandið hafi kært hann fyrir skrif á twitter. Ryan Bertrand kemur inn fyrir Gibbs.

Hodgson kom mörgum á óvart þegar hann kallaði á Raheem Sterling hjá Liverpool og Adam Lallana hjá Southampton fyrir leik enska liðsins á móti Úkraínu í síðasta mánuði og það er óhætt að segja að val hans á Shelvey nú sé einnig mjög óvænt.