Fundaði með ráðamönnum Sýrlands í nótt

Nýskipaður erindreki Sameinuðu Þjóðanna og Arababandalagsins í málefnum Sýrlands, Lakhdar Brahimi, heimsótti Sýrland í gær.

Hann fundaði með helstu ráðamönnum landsins í nótt, þar á meðal Bashar al-Assad, Sýrlandsforseta. Ekki hefur verið gefið upp hvað fór á milli erindrekans og forsetans.

Þúsundir hafa fallið í átökum uppreisnarmanna og öryggissveita frá því að stjórnarbylting hófst í landinu á síðasta ári. Sjálfur hefur Brahimi gefið út að friðarumleitanir í Sýrlandi séu nánast útilokaðar enda hafi stríðandi fylkingar í landinu ekki sýnt vilja til þess að hefja samningaviðræður.