Sahin orðinn leikmaður Liverpool

Framhaldssögunni um Tyrkjann Nuri Sahin er loksins lokið. Hann er orðinn leikmaður Liverpool og mun leika með félaginu sem lánsmaður út leiktíðina. Hann er í eigu Real Madrid. Arsenal sótti einnig stíft að fá leikmanninn en hann endaði í herbúðum Liverpool.

"Ég er ánægður og hlakka til að spila með Liverpool. Ég get líka ekki beðið eftir því að hitta stuðningsmennina. Þetta verður vonandi gott ár með bikurum," sagði Sahin.

Stjóri Liverpool, Brendan Rodgers, er hæstánægður með nýja liðsstyrkinn og efast ekki um að hann eigi eftir að styrkja Liverpool mikið.

Sahin kom til Real Madrid frá Dortmund fyrir ári síðan en hefur ekki tekist að festa sig í sessi hjá spænska stórliðinu.