Hazard: Undirbúningstímabilið var ekki eins erfitt og ég bjóst við

Belginn Eden Hazard hefur slegið í gegn í fyrstu leikjunum með Chelsea en þessi stórskemmtilegi leikmaður hefur skorað eitt mörk og lagt upp sex önnur í fyrstu þremur leikjum sínum í ensku úrvalsdeildinni.

Chelsea keypti Eden Hazard á 32 milljónir punda í sumar og það er ekki hægt að segja annað en þessi kaup ætla að borga sig ef marka má þessa frábæra byrjun.

„Það er pressa á að vinna alla leiki hjá Chelsea og markmiðið er að vinna, vinna og vinna. Við eigum möguleika á því að vinna sjö titla á þessu tímabili," sagði Eden Hazard í viðtali við The Sun.

„Við misstum af fyrsta titlinum á móti Manchester City í leiknum um Samfélagsskjöldinn en það væri frábært ef við náum að vinna tvo eða þrjá af þeim sex titlum sem eru eftir," sagði Hazard.

„Ég hef aðlagast vel lífinu í London en auðvitað er það sérstakt að koma í lið með svona mörgum stjörnuleikmönnum. Ég hef hinsvegar farið á milli landa áður á ferlinum þegar ég fór frá Belgíu til Frakklands. Ég þekki því það vel að taka svona skref," sagði Hazard.

„Leikurinn er hraðari hér og maður hefur minni tíma. Þetta eru meira krefjandi áskoranir og stuðningsmennirnir lifa fyrir fótboltann sem hljómar vel í mínum eyrum," sagði Hazard.

„Hugmyndafræði Di Matteo snýst meira um að spila fótbolta en að einbeita sér að líkamlega þættinum. Við vinnum mikið með boltann og undirbúningstímabilið var ekki eins erfitt og ég bjóst við," sagði Hazard.