Mirallas fór á kostum í stórsigri Everton

Everton er komið áfram í 3. umferð ensku deildabikarkeppninnar eftir öruggan 5-0 sigur á C-deildarliðinu Leyton Orient í kvöld.

Kevin Mirallas skoraði tvívegis fyrir Everton auk þess að leggja upp mörk fyrir þá Leon Osman og Victor Anichebe. Magaye Gueye skoraði svo fimmta og síðasta mark Everton.

Everton hefur byrjað tímabilið frábærlega en liðið er með fullt hús stiga eftir fyrstu tvær umferðir ensku úrvalsdeildarinnar.

David Moyes gerði sex breytingar á byrjunarliði sínu í kvöld og gaf Mirallas tækifæri í byrjunarliði Everton í fyrsta sinn. Mirallas, sem er belgískur, kom í sumar frá Olympiakos fyrir sex milljónir punda og nýtti tækifærið mjög vel í kvöld.

Everton þurfti að klára leikinn manni færri þar sem Phil Neville meiddist stundarfjórðungi fyrir leikslok. Moyes var þá búinn að nota allar sínar þrjár skiptingar.