Ná Brassarnir fyrsta Ólympíugullinu sínu í dag?

Brasilía og Mexíkó mætast í dag í úrslitaleiknum í knattspyrnu karla á Ólympíuleikunum í London en leikurinn fer fram á Wembley og hefst klukkan 14.00 að íslenskum tíma.

Brasilíumenn eru sigurstranglegasta þjóðin í sögu HM í fótbolta með fimm heimsmeistaratitla en þeir eiga enn eftir að vinna Ólympíugull og margir Brassar eru orðnir langeygðir eftir að landslið þeirra vinni eina titilinn sem á eftir að koma í hús.

Brassar hafa vissulega beðið lengi eftir gullinu en þeir töpuðu undanúrslitaleiknum á síðustu leikum í Peking (0-3 fyrir gulliði Argentínu) og töpuðu úrslitaleiknum á leikunum 1984 í Los Angeles (0-2 fyrir Frakklandi) og 1988 í Seoul (1-2 fyrir Sovétríkjunum).

Brasilíska liðið er líklegt til að ná loksins gullinu í dag enda búið að vinna alla fimm leiki sína á leikunum með markatölunni 15-5. Liðið er skipað mörgum frábærum fótboltamönnum enda hafa evrópsku stórliðin sýnt þeim nokkrum mikinn áhuga og nokkrir þeirra hafa verið keyptir til stórliða í sumar.

Flestra augu verða þó örugglega á Neymar sem margir Brasilíumenn telja meira að segja vera betri en Argentínumaðurinn Lionel Messi. Neymar hefur verið orðaður við Barcelona en hann er eldfljótur og teknískur framherji sem bíður jafnan upp á skemmtileg tilþrif með boltann. Neymar hefur skorað 3 mörk á mótinu.

Leandro Damião er hinsvegar markahæsti leikmaður brasilíska landsliðsins með sex mörk í fimm leikjum en hann spilar með Internacional í Brasilíu.