Aron Einar með tvö mörk í sigri á Newcastle

Aron Einar Gunnarsson fór á kostum þegar Cardiff City vann 4-1 sigur á úrvalsdeildarliði Newcastle í æfingaleik í Cardiff í dag. Aron Einar er að koma aftur inn eftir meiðsli og er greinilega orðinn góður af þeim.

Aron Einar spilaði reyndar bara fyrri hálfleikinn en skoraði tvö mörk í honum. Heiðar Helguson var einnig í byrjunarliði Cardiff í leiknum.

Aron Einar kom Cardiff í 1-0 á 16. mínútu með frábæru skoti em Tim Krul átti ekki möguleika á að verja frá honum.

Joe Ralls skoraði annað markið fjórum mínútum síðar en Aron Einar kom Cardiff síðan í 3-0 á 27. mínútu eftir að Heiðar Helguson hafði sett pressu á varnarmenn Newcastle.

Sammy Ameobi minnkaði muninn fyrir Newcastle á 49. mínútu en Etien Velikonja innsiglaði síðan sigurinn á 76. mínútu.

Aron Einar Gunnarsson fékk hvíld í seinni hálfleiknum því hann er á leiðinni til Íslands að spila landsleik á móti Færeyjum.