Zenit vill fá Berbatov til Rússlands

Rússneska meistaraliðið Zenit frá St. Pétursborg hefur áhuga á að semja við búlgarska framherjann Dimitar Berbatov. Hinn 31 árs gamli Berbatov hefur ekki fengið mörg tækifæri með enska úrvalsdeildarliðinu Manchester United að undanförnu og engar líkur eru á því að hann verði valkostur hjá Sir Alex Ferguson eftir að hann keypti Robin van Persie frá Arsenal.

Berbatov kom til Manchester United frá Tottenham árið 2008 og var hann keyptur fyrir 30 milljónir punda eða sem nemur 5,6 milljörðum kr. Hann er með góða tölfræði á bak við sig í ensku úrvalsdeildinni en hann hefur skorað 75 mörk í 178 leikjum.

Ítölsku liðin AC Milan og Juventus, Galatasaray frá Tyrklandi og ensku úrvalsdeildarliðin QPR og West Ham höfðu áhuga á að fá Berbatov til liðs við sig. Launakröfur hans eru hinsvegar það miklar að rússneska liðið virðist vera það eina sem hefur efni á að ráða hann í vinnu. Berbatov vill fá 110.000 pund í laun á viku eða sem nemur 21 milljón ísl. kr.