Ferguson: Ég græði ekkert á aukningu hlutafjár

Sir Alex Ferguson, knattspyrnustjóri Manchester United, sendi í dag breskum fjölmiðlum yfirlýsingu. Þar þvertekur hann fyrir að hagnast nokkuð á nýjustu fjárhagsaðgerðum Glazer-fjölskyldunnar, eigenda félagsins.

Bandaríska fjölskyldan ætlar sér að auka hlutafé félagsins með því að skrá það í Kauphöllina í New York. Upphaflega virtust eigendurnir ætla að nota féð til þess að greiða niður miklar skuldir félagsins. Síðar hefur komið í ljós að stór hluti fjárins mun fara til háttsettra manna innan félagsins auk Glazer-fjölskyldunnar.

Óhætt er að segja að tíðindin hafi ekki aukið vinsældir Glazer-fjölskyldunnar hjá stuðningsmönnum Manchester United sem voru litlar til að byrja með. Ferguson hefur þó margoft líst yfir ánægju sinni með bandarísku eigendurna og töldu ýmsir að stjórinn væri einn þeirra sem myndi hagnast á ráðabruggi Bandaríkjamannanna.

Í yfirlýsingunni sem Ferguson sendi frá sér þvertekur hann fyrir það. Væri fjárhagslegur ávinningur allt sem hann hugsaði um hefði hann yfirgefið Old Trafford fyrir löngu.

„Það er ekki eitt sannleikskorn í því að ég hagnist, beint eða óbeint, á aðgerðum Glazer-fjölskyldunnar," segir meðal annars í yfirlýsingunni.

„Þegar öllu er á botninn hvolft sé ég um knattspyrnuþáttinn hjá félagsinu og til að geta gert það þarf stuðning að ofan. Glazer-fjölskyldan hefur leyft mér að sinna starfi mínu. Ég finn aðeins fyrir stuðningi frá þeim, engum afskiptum eða hindrunum," segir Ferguson sem er móðgaður yfir ásökunum um græðgi.

„Ákvarðanir mínar og trú byggja ekki á hvað sé best fyrir mig fjárhagslega. Sú ásökun er móðgandi. Væri það tilfellið hefði ég yfirgefið Old Trafford fyrir löngu. Ég tjái mig um þetta mál því ég vil hvorki gefa fjölmiðlum eða öðrum tækifæri til að mynda gjá á milli mín og stuðningsmanna Manchester United. Ég hef varið 25 árum af lífi mínu í þágu félagsins. Það hefði ekki aðeins verið ómögulegt án stuðningsmannanna heldur sinni ég vinnu minni vegna stuðningsmannanna."