Ferguson vonast til þess að landa Robin van Persie

Sir Alex Ferguson, knattspyrnustjóri Manchester United, segir í vitðali á heimasíðu félagsins að liðið hafi gert formlegt kauptilboð í hollenska framherjann Robin van Persie. Man Utd náði ekki að kaupa Brasilíumanninn Lucas Moura sem er á leið til PSG í Frakklandi og Ferguson vonast til þess að kaupin á Robin van Persie gangi upp.

„Ég get ekki gefið mikið að upplýsingum, en við höfum lagt fram tilboð, og þeir eru í einnig í viðræðum við önnur félög. Ég veit ekki hvernig þetta endar en Arsenal gefur ekkert eftir í samningaviðræðunum," sagði Ferguson í gær eftir markalaust jafntefli liðsins gegn Barcelona í Gautaborg.

„Vonandi falla hlutirnir okkur í hag og við munum halda áfram að gera okkar besta í þessu máli," bætti Ferguson við. Hann er undrandi á því að franska liðið PSG hafi greitt rétt rúmlega 35 milljónir punda eða sem nemur 6,6 milljörðum kr. fyrir hinn 19 ára gamla Lucas sem lék með Sao Paulo í heimalandinu Brasilíu.