Kagawa tryggði Manchester United sigur

Japanski leikmaðurinn Shinji Kagawa skoraði eina mark leiksins þegar Manchester United vann kínverska liðið Shanghai Shenhua 1-0 í æfingaleik á Shanghai Stadium í Kína í dag. Shanghai Shenhua spilaði án þeirra Didier Drogba og Nicolas Anelka í þessum leik.

Þetta var þriðji leikur Manchester United á undirbúningstímabilinu en liðið hafði áður unnið AmaZulu 1-0 og gert 1-1 jafntefli við Ajax Cape Town. Bébé skoraði jöfnunarmarkið á moti Ajax og lagði upp sigurmarkið fyrir Kagawa í dag.

Kagawa skoraði markið sitt á 68. mínútu leiksins eftir að hafa fengið tíma til að leggja boltann fyrir sig í teignum. Bébé gerði mjög vel í að leggja boltann út á hann.

Kagawa hefur spilað vel í fyrstu leikjum sínum með Manchester United en enska stórliðið keypti hann í sumar frá þýsku meisturunum í Dortmund.