Fabio Capello: Ég hefði gert betri hluti með enska liðið á EM

Fabio Capello er tekinn við þjálfun rússneska landsliðsins og hann notaði tækifærið til að tjá sig um árangur enska landsliðsins á EM í sumar. Capello átti að stýra enska liðinu á mótinu en hætti óvænt í febrúar eftir ósætti við enska knattspyrnusambandið um þá ákvörðun að taka fyrirliðabandið af John Terry.

Roy Hodgson tók við enska liðinu af Capello og stýrði liðinu inn í átta liða úrslitin þar sem liðið tapaði fyrir Ítalíu í vítaspyrnukeppni.

„Ég hefði gert betri hluti með enska liðið á EM. Ég var í fjögur ár með liðið en gat ekki haldið áfram eftir það sem gerðist," sagði Fabio Capello.

„Við vorum komnir inn í úrslitakeppnina og það var aðeins John Terry málið sem stóð í vegi fyrir því að ég færi með liðið í keppnina," sagði hinn 66 ára gamli Capello. Enska landsliðið vann 28 af 42 leikjum undir hans stjórn og tapaði aðeins 6.

„Það stóð í samningnum mínum að þjálfarinn réði því hver yrði fyrirliði liðsins. Það stóð þar svart á hvítu. Allir landsliðsþjálfarar vinna eftir tveggja ára markmiði en því miður fékk ég ekki tækifæri til að ná markmiðum mínum á EM," sagði Capello og nú er að sjá hvort að rússneska sambandið leyfi honum að starfa í friði.