Villas-Boas: Ekkert nógu gott tilboð í Modric

Andre Villas-Boas, stjóri Tottenham, segir að félaginu hafi ekki borist nein frekari tilboð í Króatann Luka Modric sem hefur verið orðaður við spænsku meistarana í Real Madrid í allt sumar. Tottenham vill fá mun meira fyrir leikmanninn en Real var tilbúið að borga.

Luka Modric hefur ekkert æft með aðalliði Tottenham á undirbúningstímabilinu og fór ekki með liðinu í æfingaferðina til Bandaríkjanna. Hann hefur barist fyrir því að komast til Real Madrid en Tottenham vill fá sitt fyrir þennan öfluga miðjumann.

„Það er ekkert að frétta eins og er. Leikmaðurinn er bara að æfa í London og það hafa ekki komið nein betri tilboð í hann. Við höfum ekki fengið neitt tilboð sem við teljum ásættanlegt fyrir leikmann eins og Modric," sagði Andre Villas-Boas.

„Við erum með stóran leikmannhóp og vel settir í flestum stöðum þannig að við verðum bara að sjá hvernig þetta þróast. Ef ekkert gerist og leikmaðurinn verður áfram hjá okkur þá er þarna á ferðinni afar hæfileikaríkur leikmaður sem mun bæta við okkar lið," sagði Villas-Boas.