Kagawa þorði ekki í sjöuna hjá Man. United - Valencia fær hana

Antonio Valencia mun taka við sjöunni hjá Manchester United á næstu leiktíð en þessi goðsagnakennda treyja í sögu United var laus eftir að það varð staðfest að Michael Owen væri á förum frá félaginu.

Leikmenn eins og George Best, Bryan Robson, Eric Cantona, David Beckham og Cristiano Ronaldo hafa spilað í sjöunni hjá Manchester United en Japaninn Shinji Kagawa vildi hinsvegar ekki takast á við þá aukapressu að spila númer sjö hjá United.

Manchester United keypti Shinji Kagawa frá Borussia Dortmund í sumar og bauð honum sjöunda. Kagawa hafnaði því og mun spila í treyju númer 26 sem er gamla númerið hans Gabriel Obertan.

Kagawa spilaði númer 23 hjá Dortmund en Tom Cleverley hefur verið í því númeri hjá Manchester United. Ekki er búið að staðfesta öll númer leikmanna United á næstu leiktíða fyrir utan það að Nick Powell, ungi framherjinn frá Crewe, fær gamla númerið hans Antonio Valencia sem er 25.