Mancini hjá City til 2017 | Tekur ekki við landsliði Rússa

Roberto Mancini hefur skrifað undir nýjan fimm ára samning sem knattspyrnustjóri enska úrvalsdeildarfélagsins Manchester City. Sky sports greinir frá þessu.

Með samningnum er bundinn endir á orðróm þess efnis að Mancini yrði næsti landsliðsþjálfari Rússa líkt og rússneskir fjölmiðlar hafa fjallað um í dag.

Rússneska knattspyrnusambandið var talið tilbúið að greiða fúlgur fjár til að fá Mancini til þess að stýra liðinu í gegnum undankeppni heimsmeistaramótsins 2014 í Brasilíu sem fer í hönd í haust.

Mancini tók við City árið 2009 af Mark Hughes en stýrði áður Inter á Ítalíu með góðum árangri. Mancini gerði City að enskum bikarmeisturum árið 2011 og að Englandsmeisturum í vor í fyrsta skiptið í 44 ár.

Nýr samningur Mancini, sem gerði City að Englandsmeisturum á síðustu leiktíð, nær til ársins 2017.