Áfram leitað að norskri herflugvél með fimm manna áhöfn

Leit er hafin að nýju að Herkúlesflugvél frá norska flughernum en vélin hvarf af radar í gærdag í norðurhluta Svíþjóðar og allt samband við hana datt út

Fjórar björgunarþyrlur frá Noregi, Svíþjóð og Danmörku taka þátt í leitinni ásamt Orionflugvél frá Noregi. Auk þess leita norskir og sænskir hermenn að vélinni á jörðu niðri.

Leit stóð yfir fram á kvöld í gærkvöldi en þá varð að hætta henni vegna óveðurs. Fundist hefur veikt merki frá neyðarsendi á fjallinu Kebnekaise , en ekki er hægt að segja með vissu hvort það sé frá Herkúlesvélinni. Um borð í henni er fimm manna áhöfn þar af ein kona.

Þá hafa einnig fundist þrír hitablettir á leitarsvæðinu en ekki er vitað hvort þeir stafa frá vélinni, fjallgöngumönnum eða dýrum.

Vélin var á leið frá heræfingu og átti skammt farið til lendingar í Kiruna, þegar allt samband við hana rofnaði um klukkan hálfþrjú að staðartíma í gærdag.

Bengt-Olov Hammarlöf stjórnandi leitarinnar í Svíþjóð segir að út frá síðustu upplýsingum sem bárust frá Herkúlesvélinni megi áætla að leitarsvæðið sé um 18 ferkílómetrar að stærð, að mestu illfært fjalllendi.